BoT YAWAELIMISHA WAANDISHI KUHUSU CBR

 

Na mwandishi wetu

Benki Kuu ya Tanzania imekutana na waandishi wa vyombo mbalimbali vya habari nchini kutoa elimu kuhusiana na mfumo mpya wa sera ya fedha unaotumia Riba ya Benki Kuu (CBR) pamoja na uamuzi wa Kamati ya Sera ya Fedha kupandisha riba hiyo kutoka asilimia 5.5 hadi 6.

Riba mpya ya Benki Kuu itatumika katika kipindi cha robo ya pili ya mwaka 2024. 

Akizungumza katika kikao hicho, Mkurugenzi wa Utafiti na Sera za Uchumi, Dkt. Suleiman Missango, ameeleza kuwa Riba ya Benki Kuu hutolewa kama riba elekezi kwa mabenki kuweza kukopa fedha kutoka Benki Kuu.

“Ni riba ambayo BoT inatoa kama riba elekezi kwa mabenki kuweza kukopa fedha Benki Kuu ili ziweze kufanyia shughuli zao, ikiwemo kukopesha,” ameeleza.

Ameongeza kuwa riba hiyo hutumika pia kudhibiti mfumuko wa bei kwa kudhibiti kiwango cha fedha kilichopo kwenye mzunguko 

“Benki Kuu ikiona kiwango cha fedha kilichopo katika uchumi kinaelekea kuwa zaidi ya pale kinapotakiwa, hutumia mfumo huu ili kudhibiti kudhibiti mfumuko wa bei kwa kupunguza ukwasi kwenye mzunguko,” Dkt. Missango amewaeleza waandishi hao wa habari.

Vilevile, Mkurugenzi huyo wa BoT, ameeleza kuwa mfumo wa sera ya fedha unaotumia Riba ya Benki Kuu unasaidia mabenki na taasisi nyingine za fedha kupanga viwango vyao vya riba na sio kuweka ukomo wa riba kwa mabenki na taasisi zinazotoa mikopo.

“Kwa sababu hii ni riba elekezi, inasaidia mabenki na taasisi nyingine za fedha kuweza kupanga viwango vyao vya riba. Mwanzoni wakati tunaanza kutumia mfumo huu watu walifikiri kuwa Benki Kuu inaenda kuweka ukomo wa riba ; si kweli,” amesema.

Akitoa taarifa ya kuongezeka kwa Riba hiyo, tarehe 4 Aprili, 2024 Gavana wa Benki Kuu ya Tanzania Emmanuel Tutuba, alisema uamuzi wa kupandisha riba umetokana na maoteo au uchambuzi uliofanyika mwezi Machi 2024 ambao ulionesha kwamba endapo kiwango cha riba kingebakia asilimia 5.5, kulikuwa na viashiria vya mfumuko wa bei kuongezeka.

Benki Kuu ya Tanzania inaendelea kutoa elimu kwa wadau wake mbalimbali katika sekta ya fedha ili kuuelewa mfumo mpya wa sera ya fedha pamoja na masuala mengine yanayohusu kazi za Benki Kuu kwa lengo la kukuza uelewa na kuwawezesha kufanya maamuzi sahihi katika shughuli za kiuchumi.