SERIKALI KUTOA VIWANJA 21 KWA WAHANGA WA MAPOROMOKO ITEZI - DKT. TULIA

SERIKALI KUTOA VIWANJA 21 KWA WAHANGA WA MAPOROMOKO ITEZI - DKT. TULIA

Serikali itatoa  viwanja 21 kwa wahanga wa maporomoko ya tope  katika mlima kawetere,  Itezi Jijini Mbeya, huku zaidi ya vifaa na vyakula vyenye thamani ya Shilingi Milioni 40 vikitolewa  kwa wahanga kuanzia tarehe 14 Aprili maafa hayo yalipotokea hadi sasa.

Akizungumza wakati wa kukabidhi vifaa kwa ajili ya wahanga, Mbunge wa  jimbo la Mbeya Mjini ambaye pia ni  Spika wa bunge la Jamhuri ya Muungano wa Tanzania na Rais wa Umoja wa Mabunge Duniani(IPU) Mhe. Dkt. Tulia Ackson ametoa pole kwa wahanga hao na kumshukuru Mhe. Rais wa Jamhuri ya Muungano wa Tanzania Mhe. Dkt. Samia.Suluhu Hassan kwa misaada ya chakula, magodoro, fedha taslimu na  viwanja kwa wahanga.

Aidha Mhe. Dkt. Tulia amewaomba wadau wengine watakaoguswa na jambo hili kuchangia vifaa vya ujenzi ili kufanikisha kupatikana kwa sehemu ya kujihifadhi wahanga hao, baada ya   nyumba zao kufukiwa na tope.

Kwa upande wake  Mhe. William Lukuvi  akiwakilisha ujumbe kutoka Ofisi ya Rais amesema kuwa  Mhe. Rais ameguswa na kila eneo  lililokumbwa na maafa hapa nchini na bado ataendelea kutoa msaada kwa wahanga.

Mkuu wa Mkoa wa Mbeya Mhe. Juma Zuberi Homera amekiri kupokea maelekezo kutoka kwa  Mhe. Rais na kuahidi kutoa viwanja sehemu nzuri kwa wahanga  na utekelezaji utaanza mara moja.

Mhe. Dkt. Tulia amefika Itezi leo tarehe 21 Aprili, 2024  na kuzungumza na wahanga pamoja na kutembelea eneo ulipotokea mmomonyoko wa tope  katika   mlima Kawetere.