Katibu wa Itikadi na Uenezi CCM Zanzibar Azungumza na Waandishi wa Habari Dar es Salaam

 

Na mwandishi wetu

Katibu wa Itikadi na Uenezi wa Chama Cha Mapinduzi (CCM) Visiwani Zanzibar, Mheshimiwa Khamis Mbeto Khamis, leo Jumatatu Julai 28, 2025, amekutana na waandishi wa habari katika kikao maalum kilichofanyika jijini Dar es Salaam kwa lengo la kutoa ufafanuzi juu ya masuala mbalimbali ya kisiasa na maendeleo ndani ya chama hicho.

Akizungumza katika mkutano huo uliohudhuriwa na waandishi kutoka vyombo mbalimbali vya habari, Mheshimiwa Khamis amesema CCM inaendelea kuimarisha misingi ya demokrasia, umoja na maendeleo kwa wananchi wa Zanzibar na Tanzania kwa ujumla, huku akisisitiza umuhimu wa wananchi kushiriki kikamilifu kwenye mchakato wa uchaguzi mkuu unaotarajiwa kufanyika mwezi Oktoba 2025.

“Kama chama tawala, tumejipanga kuhakikisha tunashiriki uchaguzi kwa amani, kuzingatia sheria, na kuendelea kuwatumikia wananchi kwa uadilifu. Tunawahamasisha Watanzania wote, hususan vijana, wajitokeze kwa wingi kupiga kura na kuchagua viongozi wanaowapenda,” alisema Khamis.

Aidha, ameeleza kuwa chama hicho kimeendelea kujivunia utekelezaji wa Ilani ya Uchaguzi ya mwaka 2020–2025, hasa katika sekta za afya, elimu, miundombinu na uwezeshaji wa vijana na wanawake kiuchumi.

Katika kikao hicho, Mheshimiwa Khamis pia alitumia nafasi hiyo kukemea vikali vitendo vya upotoshaji na uchochezi vinavyofanywa na baadhi ya makundi ya watu mitandaoni, akiwataka wananchi kuendelea kuwa watulivu na kuamini taasisi rasmi za kiserikali na za kisiasa katika kupata taarifa sahihi.

Mkutano huo umehitimishwa kwa wito kwa waandishi wa habari kuzingatia maadili ya taaluma yao kwa kutoa taarifa zenye ukweli na kuisaidia jamii kujenga mshikamano na maendeleo endelevu.