NECTA Yatangaza Kuanza kwa Mtihani wa Kumaliza Elimu ya Msingi Septemba 10 - 11, 2025

 

Dar es Salaam, Septemba 9, 2025 

Baraza la Mitihani la Taifa (NECTA) limetangaza kuanza kwa Mtihani wa Kumaliza Elimu ya Msingi, utakaofanyika kuanzia kesho Septemba 10 hadi 11, 2025 katika shule mbalimbali nchini.

Katibu Mtendaji wa NECTA, Profesa Said Mohamed, amesema jumla ya watahiniwa 1,172,279 wamesajiliwa kufanya mtihani huo, ambapo wavulana ni 535,138 (asilimia 45.65) na wasichana ni 637,141 (asilimia 54.35).

Profesa Mohamed ameongeza kuwa asilimia kubwa ya watahiniwa hao, takribani 93.35%, watafanya mtihani kwa lugha ya Kiswahili, huku 6.65% wakitarajiwa kutumia lugha ya Kiingereza kulingana na lugha ya kujifunzia katika shule zao.

Aidha, jumla ya watahiniwa 4,679 wenye mahitaji maalum wamesajiliwa kushiriki, wakiwemo:

92 wasioona 👨‍🦯

1,551 wenye uoni hafifu 👓

1,079 wenye uziwi 👂

448 wenye ulemavu wa akili 🧠

1,509 wenye ulemavu wa viungo ♿

> “Maandalizi yote muhimu yamekamilika, yakiwemo usambazaji wa karatasi za mitihani, nyaraka muhimu, pamoja na maandalizi mahsusi kwa ajili ya watahiniwa wenye mahitaji maalum,” alisema Prof. Mohamed.

Katika hatua nyingine, NECTA imetoa wito kwa jamii, wamiliki wa shule, kamati za mitihani na wasimamizi kuhakikisha kuwa mazingira ya mitihani yanakuwa salama, tulivu, na huru dhidi ya vitendo vya udanganyifu.

> “Tunawasihi wamiliki na wakuu wa shule kutojihusisha kwa namna yoyote na usimamizi wa mitihani. Baraza halitasita kuchukua hatua, ikiwemo kufuta kituo cha mtihani endapo kitabainika kuhatarisha uhalali wa mtihani,” aliongeza Prof. Mohamed.

Mtihani wa kumaliza elimu ya msingi ni hatua muhimu katika safari ya elimu kwa wanafunzi nchini, na NECTA imesisitiza dhamira yake ya kuendelea kulinda uadilifu wa mitihani hiyo.