Na Mwandishi Wetu, Arusha
Mradi wa Uendelezaji wa Miji na Majiji Tanzania (TACTIC) unatekeleza miradi yenye thamani ya shilingi bilioni 51 katika Jiji la Arusha ikiwa ni sehemu ya uendelezaji wa jiji hilo katika sekta ya miundombinu ya barabara, masoko na stendi.
Meneja wa TARURA Wilaya ya Arusha, Mhandisi Godfrey Bwire, amesema mradi wa TACTIC katika Jiji la Arusha unajumuisha ujenzi wa barabara zenye urefu wa km 10.2. Barabara hizo ni:
Barabara ya Oljoro (Km 1.45)
-
Barabara ya Olasiti (Km 3.96)
-
Barabara ya Ngoselotoni (Km 4.8)
Ameeleza kuwa utekelezaji wake umefikia asilimia 72 na unagharimu zaidi ya shilingi bilioni 20.7.
Aidha, mradi huo pia unahusisha miradi mingine mikubwa ikiwemo:
-
Ujenzi wa Soko la Kilombero
-
Stendi mpya ya kisasa ya Bondeni City kwa ajili ya mabasi ya mikoani (kata ya Murieti)
-
Soko jipya la nyama choma Kwa Mromboo
Kwa mujibu wa Mhandisi Bwire, utekelezaji wa miradi hii umefikia asilimia 6 na unagharimu zaidi ya shilingi bilioni 30.6.
Furaha kwa Wananchi na Halmashauri
Kaimu Mkurugenzi wa Jiji la Arusha, Dkt. Maduhu Nindwa, amesema Halmashauri imepokea kwa furaha miradi hiyo kwa sababu faida zake zitagusa wananchi wote kuanzia ngazi ya mtu mmoja mmoja hadi taifa.
“Tulipokea miradi hii kwa upekee na heshima kubwa kwa Serikali yetu kutukumbuka. Itasaidia kukuza biashara hususani katika masoko ya Kilombero, Kwa Mromboo na kuimarisha barabara za kuunganisha na Bondeni City,” alisema Dkt. Nindwa.
Aliongeza kuwa miradi hiyo itasaidia si tu kiuchumi bali pia katika sekta za elimu na afya. Kupitia barabara bora, wanafunzi watasafiri kwa urahisi kwenda shule, na huduma za afya zitaboreshwa zaidi hasa kupitia mpango wa dharura wa usafiri wa kina mama wajawazito na watoto wachanga (m-mama).
Manufaa kwa Biashara za Ndani
Kwa upande wake, Mwenyekiti wa Mtaa wa Oloresho, Bw. James Stephano, alisema ujenzi wa barabara ya Oljoro umerejesha biashara zilizokuwa zimedumaa kutokana na ubovu wa barabara.
“Biashara zilizoathirika zimeanza kurudi upya, jambo linaloongeza kipato cha wananchi wetu,” alisema.
Hitimisho
Miradi hii ya bilioni 51 kupitia TACTIC inalenga kuimarisha miundombinu, kukuza biashara, kuongeza ajira na kuboresha maisha ya wananchi wa Jiji la Arusha kwa ujumla.
0 Comments