ZANZIBAR – 14 Septemba 2025
Mgombea wa Urais wa Zanzibar kupitia Chama Cha Mapinduzi (CCM), Makamu Mwenyekiti wa CCM Zanzibar, ambaye pia ni Rais wa Zanzibar na Mwenyekiti wa Baraza la Mapinduzi, Mhe. Dkt. Hussein Ali Mwinyi, ameahidi kuongeza pensheni kwa wastaafu na kuboresha maisha ya wananchi kupitia kipaumbele kwenye hifadhi ya jamii, afya, elimu, makaazi na ajira katika awamu ijayo ya serikali yake.
Dkt. Mwinyi alitoa ahadi hiyo alipokutana na viongozi wa dini, viongozi wastaafu wa Chama na Serikali, pamoja na wazee wa CCM katika hafla iliyofanyika kwenye Ukumbi wa Dkt. Idrissa Abdulwakil, Kikwajuni, leo tarehe 14 Septemba 2025.
Amesema kuwa ukuaji wa uchumi wa Zanzibar kwa asilimia 7.4 (2020–2025) ni ushahidi wa uwezo wa serikali kutekeleza miradi mikubwa ya maendeleo. Miradi hiyo ni pamoja na ujenzi wa hospitali mpya za kisasa katika mikoa ya Mnazi Mmoja, Chake Chake, Mahonda na Mkoa wa Kaskazini, pamoja na miradi ya barabara na bandari katika maeneo ya Mangapwani, Mpigaduri, Fumba na Mkoani Pemba.
> “Hakutakuwa tena na mwananchi wa Zanzibar atakayelazimika kutibiwa nje ya nchi. Tutaleta huduma bora na za kisasa hapa nyumbani. Vijana watapata ajira kupitia viwanda vipya na bandari zetu zitapunguza gharama za biashara,” – alisema Dkt. Mwinyi.
Aidha, aliwataka viongozi wa dini na wazee waendelee kuombea Zanzibar amani na mshikamano, huku akiwataka wananchi wote kuichagua CCM ili kuendeleza maendeleo yaliyopo na kuimarisha kasi mpya ya maendeleo kwa mustakabali wa Taifa.
🔖 Kauli Mbiu:
#Mwinyi2025 #CCMKwaMaendeleo #KasiMpyaYaMaendeleo #UongoziUnaoachaAlama
0 Comments